Čuveni argentinski golman Hugo Gati preminuo je u 80. godini.
Imao je nadimak El Loco – “Ludak“, a najviše nastupa skupio je za Boku Juniors (preko 350). Njegov stil branjenja bio je jedinstven za to vrijeme – često je istrčavao iz gola i aktivno učestvovao u igri, što je tada bilo gotovo nezamislivo.
Preminuo je svega nekoliko sedmica nakon što je obolio od upale pluća i operacije kuka. Ostaće upamćen po tome što je jedan od prvih golmana koji su nosili rukavice.
Za Argentinu je skupio 18 nastupa, a igrao je na SP 1966. godine. Jedan je od rijetkih koji je igrao i za Boku i River Platu, a u domaćem šampionatu drži rekord po broju nastupa (765).
